loader image

patton ka khel – a poem by Kishor Kabra

tarah-tarah ke patte laakar aao, khelen khel!
main peepal ka komal-komal
chikana-chikana patta laoon!
aur banaoon usaka baaja,
peen-peen peen-peen use bajaoon!
mere peechhe tum sab chalana, ban jaegee rel!

laoon main baragad ka patta,
utana mota jitana gatta!
is patte ka patr banaakar,
bhejoonga seedhe kalakatta!
baragad ke patte kee chitthee le jaegee mel!

aha, neem kee pattee bhaee,
are kabhee kya tumane khaee!
isakee tahanee daantun banatee
aur chhaal se bane davaee!
isee neem ke phal se nikale kadava-kadava tel!

are, aam ka patta achchha,
lagata jyon tote ka bachcha!
isee daal par aam laga hai,
magar abhee to hai vah kachcha!
maalee se bin poochhe toda to jaoge jel!

968
By: Kishor Kabra

© 2022 Pothi | All Rights Reserved

Do not copy, Please support by sharing!