loader image

mrityulok aur kuchh panktiyaan

isee sansaar kee bheed mein dikha vah ek chehara, jise bhoola nahin ja sakata.
tamaam mukhauton ke beech sachamuch ka chehara.
ya ho sakata hai ki vah itane cheharon ke beech ek shaanadaar mukhauta raha ho.
us chehare par vishaad nahin tha jabaki vah isee duniya mein rah raha tha.
vahaan prasannata jaisa kuchh bhaav tha lekin vah dukh ka theek vilom nahin tha.
lagata tha ki vah aisa chehara hai jo prastut duniya ke lie utana upayukt nahin hai.
lekin use is chehare ke saath hee jeevan jeena hoga. vah isake lie vivash tha.
usake chehare par koee vivashata nahin thee, vah dekhane vaale ke chehare par aa jaatee thee.
vah bahut se cheharon se mil kar bana tha.
use dekh kar ek saath anek chehare yaad aate the.
vah bhoole hue logon kee yaad dilaata tha.
vah ateet se milakar bana tha, vartamaan mein spandit tha
aur tatkshan bhavishy kee smriti ka hissa ho gaya tha.
vah har kaal ka samakaaleen tha.
vah mujhe ab kabhee nahin dikhega. kaheen nahin dikhega.
usake na dikhane kee vyagrata aur phir utsukata yah sambhav karegee
ki vah mere lie hamesha upasthit rahe.
usaka gum ho jaana yaad rahega.
yadi vah kabhee asambhav se sanyog se dikhega bhee to usaka itana jal bah chuka hoga
aur usamen itanee cheezen mil chukee hongee ki vah chehara kabhee nahin dikhega.
har cheez ka nirjaleekaran hota rahata hai, nadiyon ka, prithvee ka aur chandrama ka bhee.
phir vah to ek katthee-bhoora chehara hee thahara.
use dekh kar kuchh ajeevit cheezen aur bhoodrishy yaad aae. ek hee kshan mein:
lampaposton vaalee raat ke doosare pahar kee sadak.
kamalagatton se bhara taalaab.
ek chaarakhaane kee phrok.
black end white tasaveeron ka elabam.
bachapan ka miyaadee bukhaar.
stool par kaanch kee plet aur usamen ek seb.
ek chhota-sa chaakoo.
chhotee-see khidakee.
aur phooladaan.
us svapn kee tarah jise kabhee nahin paaya gaya.
jise dekha gaya lekin jisamen rahakar koee jeevan sambhav nahin.
kuchh sapanon ka keval svapn hee sambhav hai.
vah kisee ko bhee ek saath avyaavahaarik, araajak,
vyathit aur shaant bana sakata tha.
vah kaheen na kaheen pratyaksh hai lekin mere lie hamesha ke lie ojhal.
kaee cheezen sirf smriti mein hee rahatee hain.
jaise vahee unaka mrityulok hai.

956
By: Kumar Ambuj

© 2022 Pothi | All Rights Reserved

Do not copy, Please support by sharing!