loader image

is sadee mein jeevan ab vishaal shaharon mein hee sambhav hai

ab yah anant sansaar ek das baee das ka kamara
jeevit rahane kee mushkil aur gandh se bhara
khidakee se dikhatee ek rel guzaratee hai, bhaagatee hain jisakee roshaniyaan
ujaala nahin karateen, bhaagatee hain maano peechha chhudaatee hain andhere se
usakee aavaaz tharatharaahat bharatee hai lekin vah lohe kee aavaaz hai
usakee seetee kee aavaaz baaqee sabako dhvast karatee
aabaadee mein se rel guzaratee hai registaan paar karane ke lie
log jeevan mein se guzarate hain premviheen aayu paar karane ke lie
aakhir ek din prem ke bina bhee log zinda rahane lagate hain
balki khush rah kar, naachate-gaate zinda rahane lagate hain
bachapan ka gaanv ab shahar ka upanagar hai
jahaan bailagaadee se bhee jaane mein dush‍vaaree thee ab metro chalatee hai
prem kee koee praagaitihaasik tasveer taingee rahatee hai deevaar par
tasveer par giratee hai baarish, dhool aur sheet girata hai,
raat aur din girate hain, use dhaink leta hai kuhaasa
usake peechhe makadiyaan, chhipakaliyaan rahane lagatee hain
phir chikitsak kahata hai in dinon aansuon ka sookhana aam baat hai
isake lie to koee doctor dava bhee nahin likhata
ek din sab jaan hee lete hain: prem ke bina koee mar nahin jaata
khidakee se guzaratee rel dikhatee hai
aur der tak ke lie usakee aavaaz phir aadhipaty jama letee hai
anavarat nirmaanaadheen shahar kee is baareek, matamailee ret mein
mareechika jaisa bhee kuchh nahin chamakata
lekin jeevan chalata hai.

958
By: Kumar Ambuj

© 2022 Pothi | All Rights Reserved

Do not copy, Please support by sharing!