loader image

sachche vatan-parast ka geet

khauf-e-aafat se kahaan dil mein riya aaegee
baat sachchee hai jo vo lab pe sada aaegee
dil se nikalegee na mar kar bhee vatan kee ulfat
meree mittee se bhee khushaboo-e-vafa aaegee
main utha loonga bade shauq se us ko sar par
khidamat-e-qaum-o-vatan mein jo bala aaegee
saamana sabr o shujaat se karoonga main bhee
khinch ke mujh tak jo kabhee teg-e-jafa aaegee
gair zom aur khudee se jo karega hamala
meree imadaad ko khud zaat-e-khuda aaegee
aatma hoon main badal daaloonga fauran chola
kya bigaadegee agar meree qaza aaegee
khoon roegee sama par mere marane pe shafaq
gam manaane ke lie kaalee ghata aaegee
abr-e-tar ashk bahaega mire laashe par
khaak udaane ke lie baad-e-saba aaegee
zindagaanee mein to milane se jhijhakatee hai falak
khalq ko yaad miree baad-e-fana aaegee

743

Add Comment

By: Lal Chand Falak

© 2021 Pothi | All Rights Reserved

Do not copy, Please support by sharing!