aah mein ai dil-e-mazaloom asar paida kar
jis mein sauda-e-mohabbat ho vo sar paida kar
gam ka toofaan bhee agar aae to kuchh fikr na kar
qaum ka dard har ik dil mein magar paida kar
zulmat-e-gam ka nishaan tak na nazar aae kaheen
vo khayaalaat kee duniya mein sahar paida kar
sarafaroshon kee tarah pahale mita de khud ko
hind kee khaak se phir laal-o-guhar paida kar
aag be-faiz kee daulat ko laga de yaarab
kaam aae jo gareebon ke vo zar paida kar
aaj bhee qaum ke sheron ka lahoo hai tujh mein
hausala raam ka bheesham ka jigar paida kar
hon hanoomaan aur angad se hazaaron yoddha
sainkadon bheem aur arjun se bashar paida kar
aasamaan kaanpata hai naam se jin ke ab tak
aaj phir qaum mein vo lakht-e-jigar paida kar
phir zaroorat hai javaan mardon kee ai maadar-e-hind
raana-prataap se khuddaar bashar paida kar
ahad-e-rafta mein janam too ne diya tha jin ko
maadar-e-hind vahee noor-e-nazar paida kar
chain raahat se agar umr basar karanee hai
dil mein agyaar ke bhee uns se ghar paida kar
gar tamanna hai ki ho saara zamaana apana
jazba-e-ishq-o-muhabbat kee nazar paida kar
aaftaab ab tiree taqadeer ka chamakega zaroor
mard ban kar koee duniya mein hunar paida kar
jazbaat-e-aaftaab