ashru yah paanee nahin hai

ashru yah paanee nahin hai, yah vyatha chandan nahin hai!

yah na samajho dev pooja ke sajeele upakaran ye,
yah na maano amarata se maangane aae sharan ye,
svaati ko khoja nahin hai au na seepee ko pukaara,
megh se maanga na jal, inako na bhaaya sindhu khaara!
shubhr maanas se chhalak aae taral ye jvaal motee,
praan kee nidhiyaan amolak bechane ka dhan nahin hai.

ashru yah paanee nahin hai, yah vyatha chandan nahin hai!

naman saagar ko naman vishapaan kee ujjval katha ko
dev-daanav par nahin samajhe kabhee maanav pratha ko,
kab kaha isane ki isaka garal koee any pee le,
any ka vish maang kahata he svajan too aur jee le.
yah svayan jalata raha dene athak aalok sab ko
manuj kee chhavi dekhane ko mrtyu kya darpan nahin hai.

ashru yah paanee nahin hai, yah vyatha chandan nahin hai!

shankh kab phoonka shalabh ne phool jhar jaate abole,
maun jalata deep, dharatee ne kabhee kya daan tole?
kho rahe uchchh‌vaas bhee kab marm gaatha kholate hain,
saans ke do taar ye jhankaar ke bin bolate hain,
padh sabhee pae jise vah varn-aksharaheen bhaasha
praanadaanee ke lie vaanee yahaan bandhan nahin hai.

ashru yah paanee nahin hai, yah vyatha chandan nahin hai!

kiran sukh kee utaratee ghirateen nahin dukh kee ghataen,
timir laharaata na bikharee indradhanushon kee chhataen
samay thahara hai shila-sa kshan kahaan usamen samaate,
nishpalak lochan jahaan sapane kabhee aate na jaate,
vah tumhaara svarg ab mere lie paradesh hee hai.
kya vahaan mera pahunchana aaj nirvaasan nahin hai?

ashru yah paanee nahin hai, yah vyatha chandan nahin hai!

aansuon ke maun mein bolo tabhee maanoon tumhen main,
khil uthe muskaan mein parichay, tabhee jaanoon tumhen main,
saans mein aahat mile tab aaj pahachaanoon tumhen main,
vedana yah jhel lo tab aaj sammaanoon tumhen main!
aaj mandir ke mukhar ghadiyaal ghanton mein na bolo
ab chunautee hai pujaaree mein naman vandan nahin hai.

ashru yah paanee nahin hai, yah vyatha chandan nahin hai!