kaun tum mere hrday mein

kaun tum mere hrday mein?

kaun meree kasak mein nit
madhurata bharata alakshit?
kaun pyaase lochanon mein
ghumad ghir jharata aparichit?

svarn-svapnon ka chitera
neend ke soone nilay mein!
kaun tum mere hrday mein?

anusaran nishvaas mere
kar rahe kisaka nirantar?
choomane padachinh kisake
lautate yah shvaas phir phir

kaun bandee kar mujhe ab
bandh gaya apanee vijay mein?
kaun tum mere hrday mein?

ek karoon abhaav mein chir-
trpti ka sansaar sanchit
ek laghu kshan de raha
nirvaan ke varadaan shat shat,

pa liya mainne kise is
vedana ke madhur kray mein?
kaun tum mere hrday mein?

goonjata ur mein na jaane
door ke sangeet sa kya?
aaj kho nij ko mujhe
khoya mila, vipareet sa kya

kya naha aaee virah-nishi
milan-madhu-din ke uday mein?
kaun tum mere hrday mein?

timir-paaraavaar mein
aalok-pratima hai akampit
aaj jvaala se barasata
kyon madhur ghanasaar surabhit?

sun raheen hoon ek hee
jhankaar jeevan mein, pralay mein?
kaun tum mere hrday mein?

mook sukh dukh kar rahe
mera naya shrrngaar sa kya?
jhoom garvit svarg deta-
nat dhara ko pyaar sa kya?

aaj pulakit srshti kya
karane chalee abhisaar lay mein
kaun tum mere hrday mein?