loader image

mai anant path mein likhatee jo

mai anant path mein likhatee jo
sasmit sapanon kee baate
unako kabhee na dho paayengee
apane aansoo se raaten!

ud ud kar jo dhool karegee
meghon ka nabh mein abhishek
amit rahegee usake anchal-
mein meree peeda kee rekh!

taaron mein pratibimbit ho
muskaayengee anant aankhen,
ho kar seemaaheen, shoony mein
mandaraayegee abhilaashen!

veena hogee mook bajaane-
vaala hoga antardhaan,
vismrti ke charanon par aa kar
lautenge sau sau nirvaan!

jab aseem se ho jaayega
meree laghu seema ka mel,
dekhoge tum dev! amarata
khelegee mitane ka khel!

635

Add Comment

By: Mahadevi Verma

© 2022 Pothi | All Rights Reserved

Do not copy, Please support by sharing!