jo mukharit kar jaatee theen
mera neerav aavaahan,
main nen durbal praanon kee
vah aaj sula dee kampan!
thirakan apanee putalee kee
bhaaree palakon mein baandhee
nispand padee hain aankhen
barasaane vaalee aandhee!
jisake nishphal jeevan nen
jal jal kar dekhee raahen
nirvaan hua hai dekho
vah deep luta kar chaahen!
nirghosh ghataon mein chhip
tadapan chapala see sotee
jhanjha ke unmaadon mein
ghulatee jaatee behoshee!
karunaamay ko bhaata hai
tam ke paradon mein aana
he nabh kee deepaavaliyon!
tum pal bhar ko bujh jaana!