koee pahaad ye kahata tha ik gilaharee se
tujhe ho sharm to paanee mein ja ke doob mare
zara see cheez hai is par guroor! kya kahana!
ye aql aur ye samajh ye shuoor! kya kahana!
khuda kee shaan hai na-cheez! cheez ban baithen
jo be-shuoor hon yoon ba-tameez ban baithen!
tiree bisaat hai kya meree shaan ke aage
zameen hai past miree aan-baan ke aage
jo baat mujh mein hai tujh ko vo hai naseeb kahaan
bhala pahaad kahaan jaanavar gareeb kahaan!
kaha ye sun ke gilaharee ne munh sanbhaal zara
ye kachchee baaten hain dil se inhen nikaal zara!
jo main badee nahin teree tarah to kya parva!
nahin hai too bhee to aakhir miree tarah chhota
har ek cheez se paida khuda kee qudarat hai
koee bada koee chhota ye us kee hikamat hai
bada jahaan mein tujh ko bana diya us ne
mujhe darakht pe chadhana sikha diya us ne
qadam uthaane kee taaqat nahin zara tujh mein
niree badaee hai! khoobee hai aur kya tujh mein
jo too bada hai to mujh sa hunar dikha mujh ko
ye chhaaliya hee zara tod kar dikha mujh ko
nahin hai cheez nikammee koee zamaane mein
koee bura nahin qudarat ke kaar-khaane mein