loader image

sach na bolana – a poem by Nagarjun

malaabaar ke khetiharon ko ann chaahie khaane ko,
dandapaani ko lathth chaahie bigadee baat banaane ko!
jangal mein jaakar dekha, nahin ek bhee baans dikha!
sabhee kat gae suna, desh ko pulis rahee sabak sikha!

jan-gan-man adhinaayak jay ho, praja vichitr tumhaaree hai
bhookh-bhookh chillaane vaalee ashubh amangalakaaree hai!
band sel, begoosaraay mein naujavaan do bhale mare
jagah nahin hai jelon mein, yamaraaj tumhaaree madad kare.

khyaal karo mat janasaadhaaran kee rozee ka, rotee ka,
phaad-phaad kar gala, na kab se mana kar raha amareeka!
baapoo kee pratima ke aage shankh aur ghadiyaal baje!
bhukhamaron ke kankaalon par rang-birangee saaz saje!

zameendaar hai, saahukaar hai, baniya hai, vyopaaree hai,
andar-andar vikat kasaee, baahar khaddaradhaaree hai!
sab ghus aae bhara pada hai, bhaaratamaata ka mandir
ek baar jo phisale agua, phisal rahe hain phir-phir-phir!

chhutta ghoomen daakoo gunde, chhutta ghoomen hatyaare,
dekho, hantar bhaanj rahe hain jas ke tas zaalim saare!
jo koee inake khilaaf angulee uthaega bolega,
kaal kotharee mein hee jaakar phir vah sattoo gholega!

maataon par, bahinon par, ghode daudae jaate hain!
bachche, boodhe-baap tak na chhootate, satae jaate hain!
maar-peet hai, loot-paat hai, tahas-nahas barabaadee hai,
zor-julam hai, jel-sel hai. vaah khoob aazaadee hai!

rozee-rotee, hak kee baaten jo bhee munh par laega,
koee bhee ho, nishchay hee vah kamyunist kahalaega!
neharoo chaahe jinna, usako maaf karenge kabhee nahin,
jelon mein hee jagah milegee, jaega vah jahaan kaheen!

sapane mein bhee sach na bolana, varna pakade jaoge,
bhaiya, lakhanoo-dillee pahuncho, meva-misaree paoge!
maal milega ret sako yadi gala majoor-kisaanon ka,
ham mar-bhukkhon se kya hoga, charan gaho shreemaanon ka!

789

Add Comment

© 2021 Pothi | All Rights Reserved

Do not copy, Please support by sharing!