praivet bas ka draivar hai to kya hua,
saat saal kee bachchee ka pita to hai!
saamane giyar se upar
huk se lataka rakkhee hain
kaanch kee chaar choodiyaan gulaabee
bas kee raftaar ke mutaabik
hilatee rahatee hain…
jhukakar mainne poochh liya
kha gaya maano jhataka
adhed umr ka muchchhad robeela chehara
aahiste se bola: haan saab
laakh kahata hoon nahin maanatee muniya
taange hue hai kaee dinon se
apanee amaanat
yahaan abba kee nazaron ke saamane
main bhee sochata hoon
kya bigaadatee hain choodiyaan
kis zurm pe hata doon inako yahaan se?
aur draivar ne ek nazar mujhe dekha
aur mainne ek nazar use dekha
chhalak raha tha doodhiya vaatsaly badee-badee aankhon mein
taralata haavee thee seedhe-saadhe prashn par
aur ab ve nigaahen phir se ho gaeen sadak kee or
aur mainne jhukakar kaha –
haan bhaee, main bhee pita hoon
vo to bas yoon hee poochh liya aapase
varana kise nahin bhaanegee?
nanheen kalaiyon kee gulaabee choodiyaan!
Closeclose