moot aur gobar kee saaree gandh uthae
hava bail ke sooje kandhe se takarae
khaal utaaree huee bhed-see
pasaree chhaaya neem ped kee.
doy-doy karate dogar ke seengon mein
aakaash phansa hai.
daravaaze par bandhee budhiya
taala jaisee latak rahee hai.
(koee tha jo chala gaya hai)
kisee baaj panjon se chhoota zameen par
pada jhopada jaise sahama hua kabootar
deevaaron par aaen-jaen
chamada jalane kee neelee, nirjal chhaayaen.
cheekhon ke daayare samete
ye akaal ke chihn akele
manahoosee ke saath khade hain
kheton mein chaakoo ke dhele.
ab kya ho, jaisee laachaaree
andar hee andar ghun kar de vah beemaaree.
is udaas gumashuda jagah mein
jo safed hai, mrtyugrast hai
jo chhaaya hai, sirf raat hai
jeevit hai vah – jo boodha hai ya adhed hai
aur hara hai – hara yahaan par sirf ped hai
chehara-chehara dar lagata hai
ghar baahar avasaad hai
lagata hai yah gaanv narak ka
bhojapuree anuvaad hai.