loader image

bahaar aur main – a nazm by Vafa Barahi

bahaar-dar-bahaar hai
chaman mein ye pukaar hai
faza-e-murg-zaar hai
hava-e-khush-gavaar hai
chalo chalo umang mein
badho badho tarang mein

gulon pe ik nikhaar hai
zameen laala-zaar hai
khayaal shola-baar hai
nigaah be-qaraar hai
bahaar go hai josh par
khizaan hai us ke dosh par

jo bahar hai khush-aab hai
vo khush hai jo habaab hai
samaan hee la-javaab hai
sukoon mein iztiraab hai
nikhaar hai singaar hai
ubhaar hee ubhaar hai

na koee raazadaar hai
na koee gam-gusaar hai
na dil pe ikhtiyaar hai
na jee ka etibaar hai
ajeeb mera haal hai
ki zindagee vabaal hai

chaman hai saara khanda-zan
tuyoor sab hain nagma-zan
khadee huee hai har phaban
khizaan ka pahane pairahan
rahega husn-e-dahr kya
na dhaega ye qahar kya

na dil ka intikhaab hai
na koee be-hijaab hai
na aalam-e-shabaab hai
jo dekhata hoon khvaab hai
jahaan ko baqa kahaan
karam kahaan vafa kahaan

785
By: Vafa Barahi

© 2022 Pothi | All Rights Reserved

Do not copy, Please support by sharing!