loader image

mrityu aur kavi – a poem by Muktibodh

ghanee raat, baadal rimajhim hain, disha mook, nistabdh vanantar
vyaapak andhakaar mein sikudee soyee nar kee bastee bhayakar
hai nistabdh gagan, rotee-see sarita-dhaar chalee gaharaatee,
jeevan-leela ko samaapt kar maran-sej par hai koee nar
bahut sankuchit chhota ghar hai, deepaalokit phir bhee dhundhala,
vadhoo moorchhita, pita ardh-mrt, dukhita maata spandan-heen
ghanee raat, baadal rimajhim hain, disha mook, kavi ka man geela
“ye sab kshanik, kshanik jeevan hai, maanav jeevan hai kshan-bhangur” .

aisa mat kah mere kavi, is kshan sanvedan se ho aatur
jeevan chintan mein nirnay par akasmaat mat aa, o nirmal !
is veebhats prasang mein raho tum atyant svatantr niraakul
bhrasht na hone do yug-yug kee satat saadhana mahaaaraadhana
is kshan-bhar ke dukh-bhaar se, raho avichilit, raho achanchal
antaradeepak ke prakaash mein vinat-pranat aatmasy raho tum
jeevan ke is gahan atal ke liye mrityu ka arth kaho tum .

kshan-bhangurata ke is kshan mein jeevan kee gati, jeevan ka svar
do sau varsh aayu hotee to kya adhik sukhee hota nar?
isee amar dhaara ke aage bahane ke hit ye sab nashvar,
srjanasheel jeevan ke svar mein gao maran-geet tum sundar
tum kavi ho, yah phail chale mrdu geet nirbal maanav ke ghar-ghar
jyotit hon mukh navam aasha se, jeevan kee gati, jeevan ka svar .

476

Add Comment

© 2022 Pothi | All Rights Reserved

Do not copy, Please support by sharing!