loader image

sarahad ke kinaare se

tum har saal khaas mausam mein aate ho mujh tak
aur main bhee ek khaas mausam mein ho aatee hoon tumhaaree dharatee par
ek hee desh kee seema mein
nahin to tumhaare yahaan ka svarg mere sapanon mein hee aata
tum jaanate ho itana aasaan bhee nahin hota
gareeb sailaaniyon ke lie ye

tumhaaree dharatee naqshe ke usee sheersh par hai
jahaan se hamaare aazaad desh kee had khatm ho jaatee hai aur jise sarahad kaha gaya hai
ek kinaare se baandhee gaee dharatee mein hee
tum vyast rahate ho aseem jeevan mein
bunate rahate ho zaafaraan ke galeeche
pahaadon kee bulandee, kahave kee khushaboo, havaon kee taajagee
aur karate rahate ho maheen kaseedekaaree
jeevan kee

khair ab jab ham ek hee desh ke vaasee hain
to hamaara milana tay hota hai
khaas mausamon mein
tum apane kaandhe par laade meve, garm kapadon ka gaththad
kapadon kee tahon mein
apane bachchon kee shaitaanee
tumhaaree auraton ke dua salaam
aur khud ko bachae rakhane ke tamaam jatan
mujh tak pahuncha hee jaate ho ek lambe safar ke baad

main bunaavaton mein mahasoosatee rahatee hoon
tumhaaree dharatee kee tasveer
tumhaare mevon kee garmee mujhe bataatee hai ki kaise ek mushkil mausam mein
zinda raha ja sakata hai

tumhaaree aankhon se pata chal jaata hai
ki sarahad ke kinaare se had ke bheetar kee dharatee tak bhee
tumhaara aana
kisee pahaad kee chadhaee karane se jyaada kathin hota hai.
aane jaane kee tamaam suvidhaon ke baavajood!

Add Comment

By: Anuradha Ananya

© 2023 Pothi | All Rights Reserved

Do not copy, Please support by sharing!