loader image

aaie jalva-e-deedaar ke dikhalaane ko

aaie jalva-e-deedaar ke dikhalaane ko
phoonk de barq-e-tajallee mire kaashaane ko

dekhie kaun see ja yaar ka milata hai pata
koee kabe ko chala hai koee but-khaane ko

teree furqat mein tasavvur hai ye bedardee ka
khvaab ham jaanate hain neend ke aa jaane ko

bad mere jo hua dasht mein majanoon ka guzar
ro diya dekh ke khaalee mire veeraane ko

kaam aa jaatee hai ham-bazmee bhee raushan dil kee
sham ham-rang bana letee hai paravaane ko

aaj phir shahar ke kooche nazar aate hain udaas
kis taraf le gaee vahashat tire deevaane ko

ai junoon tang huee vust-e-sahara tujh se
ab kahaan jae tabeet koee bahalaane ko

gul pe bulabul tha kaheen sham pe paravaana tha
ham ne har rang mein dekha tire paravaane ko

va-shud-e-dil na huee guncha-e-khaatir na khila
kaun se baag mein aae the hava khaane ko

main ne jab vaadee-e-gurbat mein qadam rakkha tha
door tak yaad-e-vatan aaee thee samajhaane ko

Add Comment

By: Waheed Allahabadi

© 2021 Pothi | All Rights Reserved

Do not copy, Please support by sharing!