loader image

raat – a poem by Anuradha Ananya

o pyaaree raat
tum kyon nahin thaharatee us tarah
jaise rooh mein thahare rahate hain garam sparsh
jaise zehan mein thaharee rahatee hai koee yaad
tum thoda aur thaharo
aur dekho
tumhaare chaand jheelon mein, nadiyon mein kaise tairate hain
tum dekho, bechain chidiyon kee aavaazen bhee bekhauf so rahee hain apane ghosalon mein
tumhaare rang se dhake hue jangal, parvat behad sukoon mein hain
tumhaara hona kitana zarooree hai dilajalon ke lie.

band makaanon kee khidakee se jhaankatee aankhon ko dekho
kaise tumhaare rang mein ranga ambar utar raha hai unake bheetar

oh, kitana pyaara hai ye ekaant
jisamen shaamil hain saaree zinda cheezen

tum thaharo aur bharee raho khaalee man mein
der tak tairatee rahe aankhon mein
tumhaare rang kee aabha
aankhen band karane par bhee

tum thaharo
jaise thaharatee hai garbh mein aas
ek lambe samay aur dard ko kaatate hue
tab jaakar khaalee haathon mein aatee hai
meethee kilakaaree
aur phir tumhaare baad ke savere bhee kuchh aise hee hon
o raat thaharo!

Add Comment

By: Anuradha Ananya

© 2023 Pothi | All Rights Reserved

Do not copy, Please support by sharing!