loader image

theth hindi aur bolachaal kee bhaasha

ab prashn yah hoga ki kya theth hindi bolachaal kee bhaasha kahee ja sakatee hai? mera vichaar hai, nahin, kaaran batalaata hoon, suniye. jin praanton kee bhaasha aajakal hindee kahee jaatee hai, un sab praanton mein saikadon faarasee, arabee, turkee, angarezee ityaadi ke kuchh aise shabd hain, jinako sarvasaadhaaran bolate hain, aur jinako ek-ek bachcha samajhata hai. atev hindee bhaasha ke bahut se tadbhav shabdon ke samaan ve bhee vyaapak aur prachalit hain, aisee avastha mein unako hindee bhaasha ka shabd na samajhana, aur unaka prayog hindi likhane mein na karana yuktimoolak nahin. aise prachalit athava vyavahrt shabdon ke sthaan par ham koee sanskrt ka paryaayavaachee shabd likh sakate hain, parantu vah sarvasaadhaaran ko bodhagamy na hoga, kuchh shikshit log usako bhale hee samajh len, atev yah kaary bhaasha kee duruhata ka hetu hoga. isake atirikt kuchh aise shabd bhee hamako milenge, jinake yathaarth paryaayavaachee shabd hamaare paas hai hee nahin. haan, kaee shabdon dvaara ham unaka bhaav alabatta prakat kar sakate hain, kintu yah vyavahaar to pratham vyavahaar se bhee anupayogee hoga. atev aise shabdon se bachana athava unake prayog mein aanaakaanee karana hindee bhaasha ke svaroop ko jatil banaana aur use sankuchit aur sankeern karana hoga.

neeche ek vaaky likhata hoon. aap usake dvaara mere kathan kee meemaansa keejiye, usakee kasautee par mere kathan ko kasiye, us samay aapako gyaat hoga ki mera kathan kahaan tak yuktisangat hai.

“aaj main kachaharee se aa raha tha, ek chaparaasee mujhe raah mein mila, usane kaha aap se tahaseeladaar saahab naaraaj hain, aapane apanee maalaguzaaree abatak nahin jama kee, is lie ve ban bigad rahe the. aap chale jaiye to shaayad maan jaaven, nahin to saman jaroor kaat denge.”

is vaaky mein raah, naaraaj, shaayad aur jaroor ke sthaan par maarg, aprasann, syaat aur avashy ham likh sakate hain, parantu bhaasha sarv-saadhaaran ko bodhagany na hogee. kachaharee, chaparaasee, tahaseeladaar saahab, maalagujaaree, jama, saman ka paryaayavaachee koee upayukt shabd hamaare paas nahin hai. haan, gadha hua shabd athava vaaky unake sthaan par likha ja sakata hai, kintu usaka parinaam asuvidha, kasht-kalpana aur bhaasha kee mahaajatilata chhod aur kuchh na hoga, varan vaaky ko samajhana hee asambhav ho jaayaga.

ham nity, alabatta, laat joota, narm, garm ya rel, taar, daak, laalaten ityaadi shabd bolate hain, jinako sabhee samajh lete hain, phir unake prayog mein kyon sankoch kiya jaave. jab ye sab shabd hindee ke tadbhav shabd ke samaan hee vyaapak aur prachalit hain, to hindee likhane mein unaka yathaasthaan prayog avashy hona chaahie, isase suvidha to hogee hee, hindee ka vistaar bhee hoga. jis theth hindee mein any bhaashaon ka prachalit shabd bhee tadbhav shabdon ke saath svatantrataapoorvak vyavahrt hota hai, usee ko bolachaal kee bhaasha kaha ja sakata hai. isaka namoona baaboo harishchandr kee nambar-4 kee bhaasha hai, kintu unhonne usako likhane yogy nahin maana, yah unakee svatantr sammati hai.

baaboo saahab ne nan-4 kee bhaasha ko likhane yogy kyon nahin maana, isaka ek kaaran hai. jis samay ka yah lekh hai us samay kuchh aisa pravaah bah raha tha, ki hindee ke kuchh dhurandhar lekhak ek or to phaarasee, arabee ityaadi ke shabdon ka ‘baayakaat’ kar rahe the aur doosaree or urdoo ke prasiddh lekhak hindee ko phaarasee, arabee aur turkee shabdon se bhar rahe the, kuchh logon ka madhyapath tha; parantu unakee sankhya thodee thee. hindee lekhakon mein raaja lakshmanasinh aur baaboo harishchandr svayan aur unake doosare sahayogee pratham path ke pathik the. doosara maarg sabhee urdoo lekhakon ka tha, teesaree raah par raaja shivaprasaad aur unheen ke vichaar ke do ek sajjan chal rahe the. atev anumaan yah hota hai ki baaboo saahab ko apana paksh pusht karane ke lie ukt vichaar prakat karana pada tha, kintu unaka aacharan sarvatha isee ke anusaar nahin tha. unhonne is prakaar kee hindee bhee likhee aur svatantrata se likhee hai. nambar-1 kee hindee ko bhee unhonne likhane yogy nahin batalaaya hai, kintu unakee adhikaansh rachana isee bhaasha mein hai. mere kathan ka abhipraay yah hai ki nan-4 kee bhaasha ko likhane yogy na batalaana ek aisa saadhaaran amanonivesh hai jisako pramaanakoti mein nahin grahan kiya ja sakata.

Add Comment

© 2021 Pothi | All Rights Reserved

Do not copy, Please support by sharing!