loader image

chaadar aur chaar-deevaaree

huzoor, main is siyaah chaadar ka kya karoongee
ye aap kyoon mujh ko bakhshate hain ba-sad inaayat
na sog mein hoon ki us ko odhoon
gam-o-alam khalq ko dikhaoon
na rog hoon main ki is kee taareekiyon mein khiffat se doob jaoon
na main gunaahagaar hoon na mujarim
ki is syaahee kee mehar apanee jabeen pe har haal mein lagaoon

agar na gustaakh mujh ko samajhen
agar main jaan kee amaan paoon
to dast-basta karoon guzaarish
ki banda-paravar
huzoor ke hujara-e-muattar mein ek laasha pada hua hai
na jaane kab ka gala sada hai
ye aap se raham chaahata hai

huzoor itana karam to keeje
siyaah chaadar mujhe na deejie
siyaah chaadar se apane hujare kee be-kafan laash dhaanp deejie
ki us se phootee hai jo ufoonat
vo kooche-kooche mein haanphatee hai
vo sar patakatee hai chaukhaton par
barahanagee tan kee dhaanpatee hai

sunen zara dil-kharaash cheekhen
bana rahee hain ajab hayoole
jo chaadaron mein bhee hain barahana
ye kaun hain jaanate to honge
huzoor pahachaanate to honge

ye laundiyaan hain
ki yargamaalee halaal shab-bhar rahe hain
dam-e-subh dar-ba-dar hain
huzoor ke nutafe ko mubaarak ke nisf virsa se be-mo’tabar hain

ye beebiyaan hain
ki zaujagee ka khiraaj dene
qataar-andar-qataar baaree kee muntazir hain

ye bachchiyaan hain
ki jin ke sar par phira jo hazarat ka dast-e-shafaqat
to kam-sinee ke lahoo se reesh-e-saped rangeen ho gaee hai
huzoor ke hajala-e-moattar mein zindagee khoon ro gaee hai
pada hua hai jahaan ye laasha
taveel sadiyon se qatl-e-insaaniyat ka ye khoon-chakaan tamaasha

ab is tamaasha ko khatm keeje
huzoor ab is ko dhaanp deejie
siyaah chaadar to ban chukee hai miree nahin aap kee zaroorat
ki is zameen par vajood mera nahin faqat ik nishaan-e-shahavat
hayaat kee shaah-raah par jagamaga rahee hai miree zehaanat
zameen ke rukh par jo hai paseena to jhilamilaatee hai meree mehanat

ye chaar-deevaariyaan ye chaadar galee sadee laash ko mubaarak
khulee fazaon mein baadabaan khol kar badhega mira safeena
main aadam-e-nau kee ham-safar hoon
ki jisane jeetee miree bharosa-bharee rifaaqat

855

Add Comment

By: Fahmida Riaz

© 2023 Pothi | All Rights Reserved

Do not copy, Please support by sharing!