loader image

jaag tujhako door jaana

chir sajag aankhen uneendee aaj kaisa vyast baana!
jaag tujhako door jaana!

achal himagiri ke hrday mein aaj chaahe kamp ho le!
ya pralay ke aansuon mein maun alasit vyom ro le;
aaj pee aalok ko dole timir kee ghor chhaaya
jaag ya vidyut shikhaon mein nithur toophaan bole!
par tujhe hai naash path par chinh apane chhod aana!
jaag tujhako door jaana!

baandh lenge kya tujhe yah mom ke bandhan sajeele?
panth kee baadha banenge titaliyon ke par rangeele?
vishv ka krandan bhula degee madhup kee madhur gunagun,
kya dubo denge tujhe yah phool de dal os geele?
too na apanee chhaanh ko apane liye kaara banaana!
jaag tujhako door jaana!

vajr ka ur ek chhote ashru kan mein dho galaaya,
de kise jeevan-sudha do ghant madira maang laaya!
so gaee aandhee malay kee baat ka upadhaan le kya?
vishv ka abhishaap kya ab neend banakar paas aaya?
amarata sut chaahata kyon mrtyu ko ur mein basaana?
jaag tujhako door jaana!

kah na thandhee saans mein ab bhool vah jalatee kahaanee,
aag ho ur mein tabhee drg mein sajega aaj paanee;
haar bhee teree banegee maananee jay kee pataaka,
raakh kshanik patang kee hai amar deepak kee nishaanee!
hai tujhe angaar-shayya par mrdul kaliyaan bichhaana!
jaag tujhako door jaana!

698

Add Comment

By: Mahadevi Verma

© 2022 Pothi | All Rights Reserved

Do not copy, Please support by sharing!