loader image

yah mandir ka deep

yah mandir ka deep ise neerav jalane do
rajat shankh ghadiyaal svarn vanshee-veena-svar,
gaye aaratee vela ko shat-shat lay se bhar,
jab tha kal kantho ka mela,
vihanse upal timir tha khela,
ab mandir mein isht akela,
ise ajir ka shoony galaane ko galane do!

charanon se chinhit alind kee bhoomi sunahalee,
pranat shiron ke ank liye chandan kee dahalee,
jhar suman bikhare akshat sit,
dhoop-arghy naiveday aparimit
tam mein sab honge antarhit,
sabakee archit katha isee lau mein palane do!

pal ke manake pher pujaaree vishv so gaya,
pratidhvani ka itihaas prastaron beech kho gaya,
saanson kee samaadhi sa jeevan,
masi-saagar ka panth gaya ban
ruka mukhar kan-kan spandan,
is jvaala mein praan-roop phir se dhalane do!

jhanjha hai digbhraant raat kee moorchha gaharee
aaj pujaaree bane, jyoti ka yah laghu praharee,
jab tak laute din kee halachal,
tab tak yah jaagega pratipal,
rekhaon mein bhar aabha-jal
doot saanjh ka ise prabhaatee tak chalane do!

958

Add Comment

By: Mahadevi Verma

© 2022 Pothi | All Rights Reserved

Do not copy, Please support by sharing!