yaan lab pe laakh laakh sukhan iztiraab mein
vaan ek khaamushee tiree sab ke javaab mein
dikhaane ko nahin ham muztarib haalat hee aisee hai
masal hai ro rahe ho kyoon kaha soorat hee aisee hai
ai zauq vaqt naale ke rakh le jigar pe haath
varna jigar ko roega too dhar ke sar pe haath
peer-e-mugaan ke paas vo daaroo hai jis se zauq
naamard mard mard-e-javaan-mard ho gaya
uthate uthate main ne is hasarat se dekha hai unhen
apanee bazm-e-naaz se mujh ko utha kar ro die
phir mujhe le chala udhar dekho
dil-e-khaana-kharaab kee baaten
raahat ke vaaste hai mujhe aarazoo-e-marg
ai zauq gar jo chain na aaya qaza ke baad
rind-e-kharaab-haal ko zaahid na chhed too
tujh ko paraee kya padee apanee nabed too
baithe bhare hue hain khum-e-may kee tarah ham
par kya karen ki mohar hai munh par lagee huee
azeezo is ko na ghadiyaal kee sada samajho
ye umr-e-rafta kee apanee sada-e-pa samajho