aaj bah gaee meree vah vyaakul sangeet-hilor
kis digant kee or?
shithil ho gaee venee meree,
shithil laaj kee granthi,
shithil hai aaj baahu-drdh-bandhan,
shithil ho gaya hai mera vah chumban!
shithil suman-sa pada sej par anchal,
shithil ho gaee hai vah chitavan chanchal!
shithil aaj hai kal ka koojan—
pik kee pancham taan,
shithil aaj vah mera aadar—
mera vah abhimaan!
yauvan-van-abhisaar-nisha ka yah kaisa avasaan?
sukh-dukh kee dhaaraon mein kal
bahane kee thee atal pratigya—
kitana drdh vishvaas,
aur aaj kitanee durbal hoon—
letee thandhee saans!
priy abhinav!
mere antar ke mrdu anubhav!
itana to kah do—
mitee tumhaare is jeevan kee pyaas?
aur haan, yah bhee, jeevan-naath!—
meree rajanee thee yadi tumako pyaaree
to pyaara kya hoga yah alas prabhaat?
varsha, sharat, vasant, shishir, rtu sheet,
paar kiye tumane sun sunakar mere jo sangeet,
ghor greeshm mein vaisa hee man
laga, sunoge kya mere ve geet—
kaho, jeevan-dhan!
maala mein hee sookh gaye jo phool
kya na padegee unapar, priyatam,
ek drshti anukool!
taak rahe ho drshti,
jaanch rahe ho ya man?—
kshama kar rahe ho athava tum dev,
apane jan ke skhalan aur sab patan?
baandhe se tumane jis svar mein taar,
utar gaye usase ye baarambaar!
durbal mere praan
kaho bhala phir
kaise gaate rache tumhaare gaan?
mahaakavi shree raveendranaath thaakur ke bhaavon se