ghar-aangan mein aag lag rahee.
sulag rahe van-upavan,
dar deevaaren chatakh rahee hain
jalate chhappar-chhaajan.
tan jalata hai, man jalata hai
jalata jan-dhan-jeevan,
ek nahin jalate sadiyon se
jakade garhit bandhan.
door baithakar taap raha hai,
aag lagaanevaala,
mera desh jal raha,
koee nahin bujhaanevaala.
bhaee kee gardan par
bhaee ka tan gaya dudhaara
sab jhagade kee jad hai
purakhon ke ghar ka bantavaara
ek akadakar kahata
apane man ka hak le lengen,
aur doosara kahata til
bhar bhoomi na bantane dengen.
panch bana baitha hai ghar mein,
phoot daalanevaala,
mera desh jal raha,
koee nahin bujhaanevaala.
donon ke netaagan banate
adhikaaron ke haamee,
kintu ek din ko bhee
hamako akharee nahin gulaamee.
daanon ko mohataaj ho gae
dar-dar bane bhikhaaree,
bhookh, akaal, mahaamaaree se
donon kee laachaaree.
aaj dhaarmik bana,
dharm ka naam mitaanevaala
mera desh jal raha,
koee nahin bujhaanevaala.
hokar bade ladengen yon
yadi kaheen jaan main letee,
kul-kalank-santaan
saur mein gala ghont main detee.
log nipootee kahate par
yah din na dekhana padata,
main na bandhanon mein sadatee
chhaatee mein shool na gadhata.
baithee yahee bisoor rahee maa,
neechon ne ghar ghaala,
mera desh jal raha,
koee nahin bujhaanevaala.
bhagatsingh, ashaphaak,
lalmohan, ganesh balidaanee,
soch rahen hongen, ham sabakee
vyarth gaee kurabaanee
jis dharatee ko tan kee
dekar khaad khoon se seencha,
ankur lete samay usee par
kisne jahar uleecha.
haree bharee khetee par ole gire,
pad gaya paala,
mera desh jal raha,
koee nahin bujhaanevaala.
jab bhookha bangaal,
tadapamar gaya thokakar kismat,
beech haat mein bikee
tumhaaree maa – bahanon kee asmat.
jab kutton kee maut mar gae
bilakh-bilakh nar-naaree,
kahaan kaee thee bhaag us samay
maradaanagee tumhaaree.
tab anyaayee ka gadh tumane
kyon na choor kar daala,
mera desh jal raha,
koee nahin bujhaanevaala.
purakhon ka abhimaan tumhaara
aur veerata dekhee,
raam – muhammad kee santaanon!
vyarth na maaro shekhee.
sarvanaash kee lapaton mein
sukh-shaanti jhonkanevaalon!
bhole bachchen, abalao ke
chhura bhonkanevaalon!
aisee barbarata ka
itihaason mein nahin havaala,
mera desh jal raha,
koee nahin bujhaanevaala.
ghar-ghar maan kee kalakh
pita kee aah, bahan ka krandan,
haay, doodhamunhe bachche bhee
ho gae tumhaare dushman?
is din kee khaatir hee thee
shamasheer tumhaaree pyaasee?
munh dikhalaane yogy kaheen bhee
rahe na bhaaratavaasee.
hansate hain sab dekh
gulaamon ka yah dhang niraala.
mera desh jal raha,
koee nahin bujhaanevaala.
jaati-dharm grh-heen
yugon ka nanga-bhookha-pyaasa,
aaj sarvahaara too hee hai
ek hamaaree aasha.
ye chhal chhand shoshakon ke hain
kutsit, ochhe, gande,
tera khoon choosane ko hee
ye dangon ke phande.
tera eka gumaraahon ko
raah dikhaanevaala,
mera desh jal raha,
koee nahin bujhaanevaala.