tum jo jeevit kahalaane ke ho aadee
tum jisako dafana nahin sakee barabaadee
tum jinakee dhadakan mein gati ka vandan hai
tum jisakee kasakan mein chir sanvedan hai
tum jo path par aramaan bhare aate ho
tum jo hastee kee mastee mein gaate ho
tum jinane apana rath sarapat daudaaya
kuchh kshan haanphe, kuchh saans rokakar gaaya
tumane jitanee raasen taanee, modee hain
tumane jitanee saansen kheenchee, chhodee hain
unaka hisaab do aur karo rakhavaalee
kal aane vaala hai saanson ka maalee
kitanee saanson kee alaken dhool sanee hain
kitanee saanson kee palaken phool banee hain?
kitanee saanson ko sunakar mook hue ho?
kitanee saanson ko ginana chook gaye ho?
kitanee saansen duvidha ke tam mein royeen?
kitanee saansen jamuhaee lekar khoyeen?
jo saansen sapanon mein aabaad huee hain
jo saansen sone mein barbaad huee hain
jo saansen saanson se mil bahut lajaeen
jo saansen apanee hokar banee paraee
jo saansen saanson ko chhookar garamaee
jo saansen sahasa bichhud gaeen thandaee
jin saanson ko chhal liya kisee chhaliya ne
un sabako aaj sahejo is daliya mein
tum inako nirrakho parakho ya avarekho
phir saans rokakar ulat palat kar dekho
kya tum in saanson mein kuchh rah paaye ho?
kya tum in saanson se kuchh kah paaye ho?
inamen kitanee ,haathon mein gah sakate ho?
inamen kin kin ko apanee kah sakate ho?
tum chaahoge taalana prashn yah jee bhar
shaayad hans doge mere paagalapan par
kavi to adana baaton par bhee rota hai
pagale saanson ka bhee hisaab hota hai?
kuchh had tak tum bhee theek kah rahe lekin
saansen hain keval nahin havaee spandan
yah jo viraat mein utha babandar jaisa
yah jo himagiri par hai pralayankar jaisa
isake vyaaghaaton ko kya samajh rahe ho?
isake sanghaaton ko kya samajh rahe ho?
yah sab saanson kee naee shodh hai bhaee!
yah sab saanson ka mook rodh hai bhaee
jab sab andar andar ghutane lagatee hai
jab ye jvaalaon par chadhakar jagatee hai
tab hota hai bhookamp shrrng hilate hain
jvaalaamukhiyon ke vo phoot padate hain
pauraanik kahate durga machal rahee hai
aagantuk kahate duniya badal rahee hai
yah saanson ke sammilit svaron kee bolee
kuchh aisee lagatee naee naee anamolee
pahachaan jaan mein samay samay laga karata hai
pag pag nootan itihaas jaga karata hai
jan jan ka paaraavaar baha karata hai
jo banata hai deevaar dhaha karata hai
saagar mein aisa jvaar utha karata hai
tal ke motee ka pyaar tula karata hai
saansen sheetal sameer bhee badavaanal bhee
saansen hain malayaanil bhee daavaanal bhee
isalie sahejo tum inako chun chun kar
isalie sanjooinako tum gin gin kar
abatak gafalat mein jo khoya so khoya
ab tak antar mein jo boya so boya
ab to saanson kee fasal ugao bhaee
ab to saanson ke deep jalao bhaee
tumako chanda se chaav hua to hoga
tumako sooraj ne kabhee chhua to hoga?
usakee thandee garamee ka kya kar daala?
jalanidhi ka aakul jvaar kahaan par paala?
maruthal kee udatee baaloo ka lekha do
pyaale adharron kee akulaee rekha do
tumane pee lee kitanee sandhya kee laalee?
oosha ne kitanee shabanam tumamen dhaaleen?
madhurutu ko tumane kya upahaar diya tha?
patajhar ko tumane kitana pyaar kiya tha?
kya kisee saans kee ragad jvaala mein badalee?
kya kabhee vaashp see saans ban gaee badalee?
phir barasee bhee to kitanee kaisee barasee?
chaatakee bichaaree kitanee kaisee tarasee?
saanson ka faulaadee paurush bhee dekha?
kitanee saanson ne kee patthar par rekha
har saans saans kee denee hogee ginatee
tum inako jodon baith kaheen ekaakee
bekaar gaeen jo unakee kar do baaqee
jo shesh bache unaka meejaan laga lo
jeevit rahane ka ab abhimaan jaga lo
mrt se jeevit ka ab anupaat bata do
saanson kee saarthakata ka mujhe pata do
lajjit kyon hone laga gumaan tumhaara?
kya kahata hai bolo eemaanadaar tumhaara?
tum samajhe the tum sachamuch main jeete ho
tum khud hee dekho bhare ya ki reete ho
jeevan kee lajja hai to ab bhee cheto
jo jang lagee unako kharaad par reto
jitanee baaqee hain saarthak unhen bana lo
pachhatao mat aage kee raqam bhuna lo
ab kaal na tumase baazee paane paaye
ab ek saans bhee vyarth na jaane paaye
tab jeevan ka sachcha sammaan rahega
yah jiya na apane lie maut se jeeta
yah sada bhara hee raha na dhulaka reeta
Closeclose