loader image

thukara do ya pyaar karo

dev! tumhaare kaee upaasak kaee dhang se aate hain
seva mein bahumooly bhent ve kaee rang kee laate hain

dhoomadhaam se saaj-baaj se ve mandir mein aate hain
muktaamani bahumuly vastuain laakar tumhen chadhaate hain

main hee hoon gareebinee aisee jo kuchh saath nahin laayee
phir bhee saahas kar mandir mein pooja karane chalee aayee

dhoop-deep-naivedy nahin hai jhaankee ka shrrngaar nahin
haay! gale mein pahanaane ko phoolon ka bhee haar nahin

kaise karoon keertan, mere svar mein hai maadhury nahin
man ka bhaav prakat karane ko vaanee mein chaatury nahin

nahin daan hai, nahin dakshina khaalee haath chalee aayee
pooja kee vidhi nahin jaanatee, phir bhee naath chalee aayee

pooja aur pujaapa prabhuvar isee pujaarin ko samajho
daan-dakshina aur nichhaavar isee bhikhaarin ko samajho

main unamatt prem kee pyaasee hrday dikhaane aayee hoon
jo kuchh hai, vah yahee paas hai, ise chadhaane aayee hoon

charanon par arpit hai, isako chaaho to sveekaar karo
yah to vastu tumhaaree hee hai thukara do ya pyaar karo

454

Add Comment

© 2023 Pothi | All Rights Reserved

Do not copy, Please support by sharing!