loader image

maalan – a nazm by Vafa Barahi

ik ja rahee hai maalan phoolon ka haar le kar
gulshan ka husn le kar dil ka qaraar le kar
josh-e-numoo ka aalam rukhsaar mehar-e-taabaan
maathe pe surkh teeka maanind-e-subh-e-khandaan
kaanon ke zard bunde raqsaan the is ada se
parbat kee jaise titlee mauj-e-hava se khele
pairon mein daale chhaagal haathon mein pahane joshan
bikharee theen aisee zulfen bal khae jaise naagan
aankhon mein husn-e-mastee ik kaif-e-khud-numaee
qadmon mein shaan-e-lagzish goya koee sharaabee
mauj-e-nashaat-e-rangeen naazuk ada mein pinhaan
nuzahat haya kee larzaan kaafir shabaab-e-naazaan
sarshaar tha zamaana madhosh thee khudaee
kaisa lihaaz-e-taqva kya zikr-e-paarasaee
maddham suron mein fitrat kuchh gunguna rahee thee
naaz-o-ada kee devee bansee baja rahee thee
hasrat bharee nazar se main us ko tak raha tha
saaree faza pe qabza husn-o-jamaal ka tha

964
By: Vafa Barahi

© 2023 Pothi | All Rights Reserved

Do not copy, Please support by sharing!