loader image

vatan ke raag – a nazm by Afsar Merathi

bhaarat pyaara desh hamaara sab deshon se nyaara hai
har rut har ik mausam is ka kaisa pyaara pyaara hai
kaisa suhaana kaisa sundar pyaara des hamaara hai
dukh mein sukh mein har haalat mein bhaarat dil ka sahaara hai
bhaarat pyaara desh hamaara sab deshon se nyaara hai

saare jag ke pahaadon mein be-misl pahaad himaala hai
parbat sab se ooncha hai ye parbat sab se niraala hai
bhaarat kee raksha karata hai bhaarat ka rakhavaala hai
laakhon chashme bahate hain is mein laakhon nadiyon vaala hai
bhaarat pyaara desh hamaara sab deshon se nyaara hai

ganga-jee kee pyaaree laharen geet sunaatee jaatee hain
sadiyon kee tahazeeb hamaaree yaad dilaatee jaatee hain
bhaarat kee gulazaaron ko sarasabz banaatee jaatee hain
kheton ko hariyaalee detee phool khilaatee jaatee hain
bhaarat pyaara desh hamaara sab deshon se nyaara hai

hare-bhare hain khet hamaare duniya ko an dete hain
chaandee sone kee kaanon se ham jag ko dhan dete hain
prem ke pyaare phool kee khushaboo gulashan gulashan dete hain
amn-o-amaan kee nemat sab ko bhar bhar daaman dete hain
bhaarat pyaara desh hamaara sab deshon se nyaara hai

krshn kee bansee ne phoonkee hai rooh hamaaree jaanon mein
gautam kee aavaaz basee hai mahalon mein maidaanon mein
chishtee ne jo dee thee may vo ab tak hai paimaanon mein
naanak kee taaleem abhee tak goonj rahee hai kaanon mein
bhaarat pyaara desh hamaara sab deshon se nyaara hai

mazahab kuchh ho hindee hain ham saare bhaee bhaee hain
hindoo hain ya muslim hain ya sikh hain ya eesaee hain
prem ne sab ko ek kiya hai prem ke ham shaidaee hain
bhaarat naam ke aashiq hain ham bhaarat ke saudaee hain
bhaarat pyaara desh hamaara sab deshon se nyaara hai

vatan ke raag

548

Add Comment

By: Afsar Merathi

© 2023 Pothi | All Rights Reserved

Do not copy, Please support by sharing!