loader image

juganoo – a poem by Hariaudh

ped par raat kee andheree mein
juganuon ne padaav hain daale
ya divaalee mana chudailon ne
aaj hain saikadon diye baale

to unjaala na raat mein hota
baadalon se bhare andhere mein
jo na hotee jamaat juganoo kee
to na balate diye basere mein

raat barasaat kee andhere mein
to na phiratee bakherate motee
chaandataara pahan nahin paatee
juganuon mein na jot jo hotee

jagamagaen na kis tarah juganoo
ve gaye pyaar saath paale hain
kyon chamakate nahin andhere mein
raat kee aankh ke ujaanle hain

hain kabhee chhipate, chamakate hain kabhee
jhonkate kis aankh mein e dhool hain
raat mein juganoo rahe hain jagamaga
ya niraalee beliyon ke phool hain

syaah chaadar andheree raat kee
yah sunahala kaam kisane hai kiya
jagamagaate juganuon kee jot hai
ya jinon ka jugajugaata hai diya

ham chamakate juganuon ko kya kahen
daaliyon ke ek phabeele maal hain
hain andhere ke lie heere bade
raat ke godee bhare e laal hain

mol hote bhee bade anamol hain
jagamagaate raat mein donon rahen
laal damadee ka diya hai, kyon na to
juganuon ko laal gudadee ka kahen

kyon na juganoo kee jamaaton ko kahen
jot jeetee jaagatee nyaaree kalen
aandhiyaan inako bujha paatee nahin
e diye ve hain ki paanee mein balen

jab ki peechhe pada unjaala hai
tab chamak kyon saken unjere mein
hain kisee kaam ke nahin juganoo
jab chamakate mile andhere mein

raat beete nikal pade sooraj
rah sakegee na baat juganoo kee
saamane ek jeet vaale ke
kya karegee jamaat juganoo kee

jee jale aur juganoo

jagamagaate ratan jade juganoo
kalamunhee raat ke gale ke hain
juganuon kee jamaat hai phailee
ya angaare jigar jale ke hain

jo chamak kar sada chhipa, usakee
vah hamen yaad kyon dilaata hai
tab jale-tan na kyon kahen usako
jab ki juganoo hamen jalaata hai

jagamagaate hee hamen juganoo mile
jhad lagee, ole gire, aandhee bahee
aap jal kar hain jalaate aur ko
aag paanee mein lagaate hain yahee

hain bane bechain juganoo ghoomate
kaun se dukh be tarah hain khal rahe
hai bujha paata na usako menh-jal
hain na jaane kis jalan se jal rahe

be tarah vah kyon jalaata hai hamen
hai sitam usaka nahin jaata saha
kya raha karata unjaala aur ko
aap juganoo jab andhere mein raha

kaun jalate ko jalaata hai nahin
tar baneen barasaat raaten-dekh leen
jal barasana dekh meghon ka liya
thaam dil juganoo-jamaaten dekh leen

megh kaale, kaal kyon hain ho rahe
kis liye kal, kalamuhee raaten haren
bekalon ko betarah bekal bana
kal-munhe juganoo na munh kaala karen!

Add Comment

© 2023 Pothi | All Rights Reserved

Do not copy, Please support by sharing!