sab biyaabaan, sunasaan andheree raahon mein
khandakon khaiyon mein
registaanon mein, cheekh karaahon mein
ujadee galiyon mein
thakee huee sadakon mein, tootee baahon mein
har gir jaane kee jagah
bikhar jaane kee aashankaon mein
lohe kee sakht shilaon se
drdh au’ gatimay
ham teen dost
roshanee jagaate hue andheree raahon par
sangeet bichhaate hue udaas karaahon par
prerana-sneh un nirbal tootee baahon par
vijayee hone ko saaree aashankaon par
pagadandee gadhate
aage badhate jaate hain
ham teen dost paanvon mein gati-satvar baandhe
aankhon mein manjil ka vishvaas amar baandhe.
x x x x
ham teen dost
aatma ke jaise teen roop,
avibhaajy–bhinn.
thandee, sam, athava garm dhoop–
ye tray prateek
jeevan jeevan ka star bhedakar
ekaroopata ko sateek kar dete hain.
ham jhukate hain
rukate hain chukate hain lekin
har haalat mein uttar par uttar dete hain.
x x x x
ham band pade taalon se darate nahin kabhee
asaphalataon par gussa karate nahin kabhee
lekin vipadaon mein ghir jaane vaalon ko
aadhe path se vaapas phir jaane vaalon ko
ham apana yauvan apanee baanhen dete hain
ham apanee saansen aur nigaahen dete hain
dekhen–jo tam ke andhad mein gir jaate hain
ve sabase pahale din ke darshan paate hain.
dekhen–jinakee kismat par kismat rotee hai
manzil bhee aakhirakaar unheen kee hotee hai.
x x x x
jis jagah bhoolakar geet na aaya karate hain
us jagah baith ham teenon gaaya karate hain
dene ke lie sahaara girane vaalon ko
soone path par aavaara phirane vaalon ko
ham apane shabdon mein samajhaaya karate hain
svar-sanketon se unhen bataaya karate hain–
‘tum aaj agar rote ho to kal ga loge
tum bojh uthaate ho, toofaan utha loge
pahachaano dharatee karavat badala karatee hai
dekho ki tumhaare paanv tale bhee dharatee hai.’
x x x x
ham teen dost is dharatee ke sanrakshan mein
ham teen dost jeevit mittee ke kan kan mein
har us path par maujood jahaan pag chalate hain
tam bhaag raha de peeth deep-nav jalate hain
aansoo keval hamadardee mein hee dhalate hain
sapane anagin nirmaan lie hee palate hain.
ham har us jagah jahaan par maanav rota hai
atyaachaaron ka nanga nartan hota hai
aasteenon ko oopar kar nij mutthee taane
bedhadak chale jaate hain ladane mar jaane
ham jo daraar pad chukee saans se seete hain
ham maanavata ke lie jindagee jeete hain.
x x x x
ye baag buzurgon ne aansoo au’ shram dekar
paale se raksha kar paala hai gam dekar
har saal koee isakee bhee fasalen le khareed
koee lakadee, koee patton ka ho mureed
kis tarah gavaara ho sakata hai yah hamako
ye fasal nahin bik sakatee hai nishchay samajho.
…ham dekh rahe hain chidiyon kee lolup paankhen
is or lageen bachchon kee ve anagin aankhen
jinako ras ab tak mila nahin hai ek baar
jinaka bas ab tak chala nahin hai ek baar
ham unako kabhee niraash nahin hone denge
jo hota aaya ab na kabhee hone denge.
x x x x
o naee chetana kee pratimaon, dheer dharo
din door nahin hai vah ki lakshy tak pahunchenge
svar bhoo se lekar aasamaan tak goonjega
sookhee galiyon mein ras ke sote phootenge.
ham apane laal rakt ko pighala rahe aur
yah laalee dheere dheere badhatee jaegee
maanav kee moorti abhee nirmit jo kaalikh se
is laalee kee paraton mein madhatee jaegee
yah maun
sheeghr hee tootega
jo ubal ubal sa padata hai man ke bheetar
vah phootega,
aata hee nishi ke baad
subah ka gaayak hai,
tum apanee sab sundar anubhooti sanjo rakkho
vah beej ugega hee
jo ugane laayaq hai.
x x x x
ham teen beej
ugane ke lie pade hain har chauraahe par
jaane kab varsha ho kab ankur phoot pade,
ham teen dost ghutate hain keval iseelie
is oob ghutan se jaane kab sur phoot pade .