loader image

sapaat seene vaalee ladakiyaan

sapaat seene vaalee ladakiyaan har jagah se thukaraayee gayeen

rishte kee baat karane aae ladake vaalon ne
jab nazar bhar ke use dekha to phir
usaka koee aur hunar maayane na raha

pulis kee naukaree mein chune jaane se bhee,
sangh lok seva aayog ne sharton mein likha hai
ki kitane inch ka hona chaahie seena

kisee chitrakaar ne apane khoobasoorat chitron mein
jagah nahin dee us stree ko
jisake seene par ubhaar na tha
chitr banaane ke lie sudaul shareer ka bimb sabase aakarshak tha

aae din dekha tiraskaar
saheliyon ke chutakulon mein, pati kee nazaron mein
antarang kshanon mein bhee vo premee ke saamane sahamee-sahamee see rahee
kabhee khud ko hee aaeene mein dekh huee sharminda
kabhee paided bra mein chhipaatee rahee khud se khud ko hee

usake lie chhaatee par dupatta daalana
bhare badan vaalee ladakee jitana hee zarooree tha
taaki vo bacha sake khud ko us par hansatee huee laalachee nazaron se
haan, bhare badan ka matalab bharee huee chhaatiyon se hee hai shaayad!

Add Comment

By: Ekta Nahar

© 2021 Pothi | All Rights Reserved

Do not copy, Please support by sharing!