sooraj dhal kar pachchhim panhucha,
dooba, sandhya aaee, chhaee,
sau sandhya see vah sandhya thee,
kyon uthate-uthate socha tha
din mein hogee kuchh baat naee
lo din beeta, lo raat gaee
dheeme-dheeme taare nikale,
dheere-dheere nabh mein faile,
sau rajanee see vah rajanee thee,
kyon sandhya ko yah socha tha,
nishi mein hogee kuchh baat naee,
lo din beeta, lo raat gaee
chidiyaan chahakee, kaliyaan mahakee,
poorab se fir sooraj nikala,
jaise hotee thee, subah huee,
kyon sote-sote socha tha,
hogee praat: kuchh baat naee,
lo din beeta, lo raat gaee