loader image

sokh na lena paanee

sooraj!
sokh na lena paanee!

tadap tadap kar mar jaegee
mann kee meen sayaanee!
sooraj, sokh na lena paanee!

bahatee nadiya saara jeevan
saansen jal kee dhaara
jis par tair raha naavon-sa
andhiyaara ujiyaara
boond-boond mein goonj rahee hai
koee prem kahaanee!
sooraj, sokh na lena paanee!

yah duniya panaghat kee halachal
panihaarin ka mela
naach raha hai man paayal ka
har ghunghuroo alabela
laharen baanch rahee hain
mann kee koee baat puraanee!
sooraj, sokh na lena paanee!

687
By: Kunwar Bechain

© 2021 Pothi | All Rights Reserved

Do not copy, Please support by sharing!