masanad-e-shaahee kee hasarat ham faqeeron ko nahin
farsh hai ghar mein hamaare chaadar-e-mahataab ka
aasaar-e-ishq aankhon se hone lage ayaan
bedaaree kee taraqqee huee khvaab kam hua
aaj tak apanee jagah dil mein nahin apane huee
yaar ke dil mein bhala poochho to ghar kyoon-kar karen
bhara hai sheesha-e-dil ko naee mohabbat se
khuda ka ghar tha jahaan vaan sharaab-khaana hua
qaamat tiree daleel qayaamat kee ho gaee
kaam aaftaab-e-hashr ka rukhsaar ne kiya
koo-e-jaanaan mein bhee ab is ka pata milata nahin
dil mira ghabara ke kya jaane kidhar jaata raha
mujh mein aur sham mein hotee thee ye baaten shab-e-hijr
aaj kee raat bachenge to to sahar dekhenge
main us gulashan ka bulabul hoon bahaar aane nahin paatee
ki sayyaad aan kar mera gulistaan mol lete hain
bayaan khvaab kee tarah jo kar raha hai
ye qissa hai jab ka ki aatish javaan tha
ai falak kuchh to asar husn-e-amal mein hota
sheesha ik roz to vaiz ke bagal mein hota