gagan par do sitaare: ek tum ho,
dhara par do charan hain: ek tum ho,
‘trivenee’ do nadee hain! ek tum ho,
himaalay do shikhar hai: ek tum ho,
rahe saakshee laharata sindhu mera,
ki bhaarat ho dhara ka bindu mera .
kala ke jod-see jag-gutthiyaan ye,
hrday ke hod-see drdh vrttiyaan ye,
tirange kee tarangon par chadhaate,
ki shat-shat jvaar tere paas aate .
tujhe saugandh hai ghanashyaam kee aa,
tujhe saugandh bhaarat-dhaam kee aa,
tujhe saugandh seva-graam kee aa,
ki aa, aakar ujadaton ko bacha, aa .
tumhaaree yaatanaen aur anima,
tumhaaree kalpanaen aur laghima,
tumhaaree gagan-bhedee goonj, garima,
tumhaare bol ! bhoo kee divy mahima
tumhaaree jeebh ke painro mahaavar,
tumhaaree asti par do yug nichhaavar .
rahe man-bhed tera aur mera, amar ho desh ka kal ka sabera,
ki vah kashmeer, vah nepaal; gova; ki saakshee vah javaahar, yah vinoba,
pralay kee aah yug hai, vaah tum ho,
jara-se kintu laaparavaah tum ho.