are o aasamaan vaale bata is mein bura kya hai
khushee ke chaar jhonke gar idhar se bhee guzar jaen
tujh ko khabar nahin magar ik saada-lauh ko
barbaad kar diya tire do din ke pyaar ne
kis darja dil-shikan the mohabbat ke haadase
ham zindagee mein phir koee aramaan na kar sake
vafa-shiaar kaee hain koee haseen bhee to ho
chalo phir aaj usee bevafa kee baat karen
un ka gam un ka tasavvur un ke shikave ab kahaan
ab to ye baaten bhee ai dil ho gaeen aaee gaee
phir na keeje miree gustaakh-nigaahee ka gila
dekhie aap ne phir pyaar se dekha mujh ko
har ek daur ka mazahab naya khuda laaya
karen to ham bhee magar kis khuda kee baat karen
koee to aisa ghar hota jahaan se pyaar mil jaata
vahee begaane chehare hain jahaan jaen jidhar jaen
lo aaj ham ne tod diya rishta-e-umeed
lo ab kabhee gila na karenge kisee se ham
ham jurm-e-mohabbat kee saza paenge tanha
jo tujh se huee ho vo khata saath lie ja