jis ka gora rang ho vo raat ko khilata hai khoob
raushanaee sham kee pheekee nazar aatee hai subh
khuda deve agar qudarat mujhe to zid hai zaahid kee
jahaan tak masjiden hain main banaoon tod but-khaana
eemaan o deen se taabaan kuchh kaam nahin hai ham ko
saaqee ho aur may ho duniya ho aur ham hon
main to taalib dil se hoonga deen ka
daulat-e-duniya mujhe mataloob nahin
mujh se beemaar hai mira zaalim
ye sitam kis tarah sahoon taban
zaahid ho aur taqva aabid ho aur musalla
maala ho aur barahaman sahaba ho aur ham hon
aaine ko tiree soorat se na ho kyoon kar hairat
dar o deevaar tujhe dekh ke hairaan hai aaj
aaeena roo-ba-roo rakh aur apanee chhab dikhaana
kya khud-pasandiyaan hain kya khud-numaeeyaan hain
zaahid tira to deen saraasar fareb hai
rishte se tere subha ke zunnaar hee bhala
ye jo hain ahal-e-riya aaj faqeeron ke beech
kal ginenge humaqa un hee ko peeron ke beech