tavaqqo hai dhoke mein aa kar vah padh len
ki likkha hai naama unhen khat badal kar
khushaamad ai dil-e-betaab is tasveer kee kab tak
ye bola chaahatee hai par na bolegee na bolee hai
barahaman dair se kaabe se phir aae haajee
tere dar se na sarakana tha na sarake aashiq
shaikh kahata hai barahaman ko barahaman us ko sakht
kaaba o but-khaana mein patthar hai patthar ka javaab
saara parda hai duee ka jo ye parda uth jae
gardan-e-shaikh mein zunnaar barahaman daale
raaste aur tavaazo mein hai rabt-e-qalbee
jis tarah laam alif mein hai alif laam mein hai
furqat mein munh lapete main is tarah pada hoon
jis tarah koee murda lipata hua kafan mein
hai vasiyyat ki kafan mujh ko isee ka dena
haath aa jae jo utara hua pairaahan-e-dost
jis guncha-lab ko chhed diya khanda-zan hua
jis gul pe ham ne rang jamaaya chaman hua
kaaba-e-rukh kee taraf padhanee hai aankhon se namaaz
chaahie gard-e-nazar bahar-e-tayammum mujh ko