ye bhee ik baat hai adaavat kee
roza rakkha jo ham ne daavat kee
teree masjid mein vaiz khaas hain auqaat rahamat ke
hamaare may-kade mein raat din rahamat barasatee hai
hai javaanee khud javaanee ka singaar
saadagee gahana hai is sin ke lie
zabt dekho udhar nigaah na kee
mar gae marate marate aah na kee
kis dhitaee se vo dil chheen ke kahate hain ameer
vo mira ghar hai rahe jis mein mohabbat meree
lutf aane laga jafaon mein
vo kaheen meharabaan na ho jae
pahaloo mein mere dil ko na ai dard kar talaash
muddat huee gareeb vatan se nikal gaya
achchhe eesa ho mareezon ka khayaal achchha hai
ham mare jaate hain tum kahate ho haal achchha hai
karata main dardamand tabeebon se kya rujoo
jis ne diya tha dard bada vo hakeem tha
qareeb hai yaaro roz-e-mahashar chhupega kushton ka khoon kyoonkar
jo chup rahegee zabaan-e-khanjar lahoo pukaarega aasteen ka