dekhane aae the vo apanee mohabbat ka asar
kahane ko ye hai ki aae hain ayaadat kar ke
kahane ko to main bhool gaya hoon magar ai yaar
hai khaana-e-dil mein tiree tasveer abhee tak
iqaraar hai ki dil se tumhen chaahate hain ham
kuchh is gunaah kee bhee saza hai tumhaare paas
vaaqif hain khoob aap ke tarz-e-jafa se ham
izahaar-e-iltifaat kee zahamat na keejie
aap ko aata raha mere sataane ka khayaal
sulh se achchhee rahee mujh ko ladaee aap kee
sher dar-asl hain vahee hasrat
sunate hee dil mein jo utar jaen
aur to paas mire hijr mein kya rakkha hai
ik tire dard ko pahaloo mein chhupa rakkha hai
barq ko abr ke daaman mein chhupa dekha hai
ham ne us shokh ko majaboor-e-haya dekha hai
dopahar kee dhoop mein mere bulaane ke lie
vo tira kothe pe nange paanv aana yaad hai
maaloom sab hai poochhate ho phir bhee mudda
ab tum se dil kee baat kahen kya zabaan se ham