college se aa rahee hai sada paas paas kee
ohadon se aa rahee hai sada door door kee
but-kade mein shor hai akbar musalamaan ho gaya
be-vafaon se koee kah de ki haan haan ho gaya
kis naaz se kahate hain vo jhunjhala ke shab-e-vasl
tum to hamen karavat bhee badalane nahin dete
pad jaen mire jism pe laakh aabale akbar
padh kar jo koee phoonk de april may june
daava bahut bada hai riyaazee mein aap ko
tool-e-shab-e-firaaq ko to naap deejie
samajh mein saaf aa jae fasaahat is ko kahate hain
asar ho sunane vaale par balaagat is ko kahate hain
ek kaafir par tabeeat aa gaee
paarasaee par bhee aafat aa gaee
tahaseen ke laayaq tira har sher hai akbar
ahabaab karen bazm mein ab vaah kahaan tak
kuchh tarz-e-sitam bhee hai kuchh andaaz-e-vafa bhee
khulata nahin haal un kee tabeeat ka zara bhee
public mein zara haath mila leejie mujh se
saahab mire eemaan kee qeemat hai to ye hai