is qadar musalasal theen shiddaten judaee kee
aaj pahalee baar us se main ne bevafaee kee
chala tha zikr zamaane kee bevafaee ka
so aa gaya hai tumhaara khayaal vaise hee
guftugoo achchhee lagee zauq-e-nazar achchha laga
muddaton ke baad koee ham-safar achchha laga
na manzilon ko na ham rahaguzar ko dekhate hain
ajab safar hai ki bas ham-safar ko dekhate hain
umr bhar kaun nibhaata hai taalluq itana
ai miree jaan ke dushman tujhe allaah rakkhe
so dekh kar tire rukhsaar o lab yaqeen aaya
ki phool khilate hain gulazaar ke alaava bhee
mujh se bichhad ke too bhee to roega umr bhar
ye soch le ki main bhee tiree khvaahishon mein hoon
ab tire zikr pe ham baat badal dete hain
kitanee ragabat thee tire naam se pahale pahale
dost ban kar bhee nahin saath nibhaane vaala
vahee andaaz hai zaalim ka zamaane vaala
ye kin nazaron se too ne aaj dekha
ki tera dekhana dekha na jae