jo gair the vo isee baat par hamaare hue
ki ham se dost bahut be-khabar hamaare hue
ye kaun phir se unheen raaston mein chhod gaya
abhee abhee to azaab-e-safar se nikala tha
jo gazal aaj tire hijr mein likkhee hai vo kal
kya khabar ahal-e-mohabbat ka taraana ban jae
saaqiya ek nazar jaam se pahale pahale
ham ko jaana hai kaheen shaam se pahale pahale
har tarah kee be-sar-o-saamaaniyon ke baavajood
aaj vo aaya to mujh ko apana ghar achchha laga
main bhee palakon pe saja loonga lahoo kee boonden
tum bhee pa-basta-e-zanjeer-e-hina ho jaana
naaseha tujh ko khabar kya ki mohabbat kya hai
roz aa jaata hai samajhaata hai yoon hai yoon hai
sitam to ye hai ki zaalim sukhan-shanaas nahin
vo ek shakhs ki shaer bana gaya mujh ko
na tujh ko maat huee hai na mujh ko maat huee
so ab ke donon hee chaalen badal ke dekhate hain
raat bhar hansate hue taaron ne
un ke aariz bhee bhigoe honge