hue mar ke ham jo rusva hue kyoon na garq-e-dariya
na kabhee janaaza uthata na kaheen mazaar hota
khulata kisee pe kyoon mire dil ka moaamala
sheron ke intikhaab ne rusva kiya mujhe
main ne maana ki kuchh nahin ghalib
muft haath aae to bura kya hai
thee khabar garm ki ghalib ke udenge purze
dekhane ham bhee gae the pa tamaasha na hua
arz-e-niyaaz-e-ishq ke qaabil nahin raha
jis dil pe naaz tha mujhe vo dil nahin raha
rahie ab aisee jagah chal kar jahaan koee na ho
ham-sukhan koee na ho aur ham-zabaan koee na ho
ya-rab vo na samajhe hain na samajhenge miree baat
de aur dil un ko jo na de mujh ko zabaan aur
kaun hai jo nahin hai haajat-mand
kis kee haajat rava kare koee
na suno gar bura kahe koee
na kaho gar bura kare koee
be-niyaazee had se guzaree banda-paravar kab talak
ham kahenge haal-e-dil aur aap faramaavenge kya